بصراحه مش عارف أكتب عن ايه و الكتاب والمدونين كتبوا عن كل حاجه في البلد
ومفيش فايده يعني اللي احنا بنعمله ده من غير فايده بس هنعمل ايه أدينا بنعبر عن
اللي جوانا وخلاص أحسن ما نموت من الغيظ ونطق من اللي الحكومه بتعمله فينا
في الاول فكرت اكتب عن البطاله لقيت ان كل جرايد المعارضه مكتظه بالملفات و
المقالات اللي بتتكلم عن الموضوع ده والحوادث والجرائم المترتبه على موضوع
البطاله في صفحات الحوادث كل يوم قلت سيبك من الموضوع ده واكتب في موضوع تاني
أول حاجه فكرت فيها هي التعليم اللي وصل الشباب للبطاله أيوه التعليم في مصر كده
نتعلم اكتر من 17سنه عشان نقعد في الشارع والقهاوي ومفيش برده حل لموضوع التعليم
اللي كل يوم حالة التعليم تزداد سوء بس هنعمل ايه طالما اللي ماسكين زمام الامور ناس
معندهمش ضمير وأهم حاجه عندهم المنصب والمال والجاه ولا بيفكرو في الشعب المطحون
ولا الشباب اللي مش لاقيين فلوس حتى يقعدوا بيها عالقهاوي هتقوللي بيقعدوا عالقهاوي ليه
هقوللك اصلهم مايقدروش يقعدوا في البيت لان الاب والام زهقوا من كلمهة يابني روح شوفلك
شغلانه ياابني انت هتفضل قاعد كده على طول عشان كده الشاب مننا بيخرخ عشان يهرب من
السخط الي عليه من قلة الشغل طيب هو هيعمل ايه مش لاقي شغل
هو ده الحال اللي وصل اليه الشباب التعليم زباله مش مأهله انه يشتغل وأصلا لو اخد كورسات
الشباب كلهم بيخدوا كورسات وكله في الفاضي هيه كد نحس مفيش مخرج للمأزق اللي احنا فيه
واحد يقوللي ايه التشاؤم ده أقوله هو ده الللي بيحصل فعلا والله ده حصل معايا اتخرجت من الكليه مش
اي حاجه بدأت في الكورسات لقيت كل الناس كده واخدين كورسات وبرده مش لاقيين شغل
هنعمل ايه بس في اللي بيحصل ده الوضع ده هيتغير امته وازاي ومين اللي هيغير وبأي طريقه
عايزين حل مجرد أمل حتى في تطوي للوضع اللي البلد فيه
اللي بيحاول يتكلم عن الفساد في البلد بيخرسوه واللي بيقاومه بيعتقلوه واللي بيكتب عنه بيتلفق له قضايا كتيره
واحنا كلنا عارفين اللي اعتقلوا بسبب نشاطهم السياسي ويا ريت على حد الاعتقال ده بيتخرب بيته كمان
هييييييييييييييييييييييييييييه يا مصرلسه بعد كده ايه
Subscribe to:
Post Comments (Atom)
No comments:
Post a Comment